മദ്യപാനം തലച്ചോറിന് കേടുവരുത്തും

മദ്യത്തിന്റെ കൂടിയ ഉപയോഗം തലച്ചോറിന്റെ ഘടനയേയും ശരീരശാസ്‌ത്രത്തേയും(physiology) ബാധിക്കുമെന്ന് പുതിയ neuroimaging പഠനങ്ങള്‍ സൂചിപ്പിക്കുന്നു. സ്ഥിരമായ മദ്യപാനം തലച്ചോറിലെ സെറിബല്ലം (cerebellum) എന്ന ഭാഗത്തിന് കേടുവരുത്തും. മാംസപേശി നിയന്ത്രണം, ഭാഷ, ശ്രദ്ധ ഇവയൊക്കെ ചെയ്യുന്നത് ഈ ഭാഗമാണ്. അതുപോലെ prefrontal cortex ചുരുങ്ങാനും ഗുണം കുറയാനും മദ്യപാനം കാരണമാകുന്നു. തീരുമാനമെടുക്കല്‍, സാമൂഹ്യ സ്വഭാവം എന്നിവ നിയന്ത്രിക്കുന്ന ഭാഗമാണിത്. കൂടാതെ ഈ ഭാഗങ്ങളെ കൂട്ടിയോജിപ്പിക്കുന്ന തലച്ചോറിലെ white matter നും കേടുപാടുണ്ടാക്കുന്നു.

മദ്യപാനം നിര്‍ത്തിയാല്‍ ഈ ഭാഗങ്ങള്‍ വീണ്ടും ആരോഗ്യം പ്രാപിക്കുമോ എന്നത് ഒരു ചോദ്യമായി അവശേഷിക്കുകയാണ്. മദ്യ വര്‍ജ്ജനം നടത്തിയ ആളുകളില്‍ വര്‍ഷങ്ങള്‍ കൊണ്ട് തലച്ചോറിന്റെ ചില ഭാഗങ്ങള്‍ മദ്യപാനത്തിന് മുമ്പുള്ള പഴയ സ്ഥിതിയില്‍ എത്തിയതായി പഠനം നടത്തിയ ഗവേഷകര്‍ കണ്ടെത്തി. കേടുപാടുകള്‍ പരിഹരിക്കാന്‍ കഴിവുള്ള ന്യൂറല്‍ കണക്ഷനുകള്‍ വര്‍ഷങ്ങള്‍ നീണ്ടു നിന്ന മദ്യ വര്‍ജനം കൊണ്ട് തിരികെ വരുന്നുണ്ട്. തീരുമാനങ്ങളെടുക്കല്‍, യുക്തിചിന്ത, പ്രശ്ന പരിഹാരം തുടങ്ങിയവ ചെയ്യുന്ന frontocerebellar circuitry അത്തരത്തിലൊന്നാണ്.

എന്നാല്‍ ചില സ്ഥലങ്ങളിലെ മാറ്റം സ്ഥിരമാണ്. ദീര്‍ഘകാലത്തെ ഓര്‍മ്മ, ചലനം(spatial navigation) തുടങ്ങിയവക്ക് കാരണമായ hippocampus മദ്യപാനം കൊണ്ട് സ്ഥായിയായി നശിച്ചുപോകുന്ന ഒന്നാണ്. മറ്റൊരു ഭാഗം ആണ് white matter. എന്നാലും മദ്യ വര്‍ജനത്തിന്റെ തലച്ചോറിലെ ഫലം പല ആളുകള്‍ക്കും പല രീതിയിലാണ് സംഭവിക്കുക. neuroimaging പഠനങ്ങള്‍ ഭാവിയില്‍ ഇതിനെക്കുറിച്ച് കൂടുതല്‍ വെളിച്ചം വീശും.

— സ്രോതസ്സ് scientificamerican.com

എന്തുതന്നെയായാലും ഞാന്‍ പരീക്ഷണത്തിനില്ല. എനിക്ക് വിലപ്പെട്ടതെന്ന് പറയാന്‍ എന്റെ തലച്ചോറ് മാത്രമാണ്. അതിന്റെ ഒരു കോശത്തിന് പോലും കുഴപ്പമുണ്ടാക്കുന്ന കാര്യം ഞാന്‍ അറിഞ്ഞുകൊണ്ട് ചെയ്യില്ല.