സര്‍ക്കാരുകളുടെ അടിസ്ഥാനം എന്നത് ജനസമ്മതിയാണ്. നമ്മുടെ സമ്മതം കൊണ്ടാണ് ഇന്ന് നാം കാണുന്ന സംവിധാനങ്ങളെല്ലാം പ്രവര്‍ത്തിക്കുന്നത്. വെറും ഒരു 10% ആളുകള്‍ അതിനെ വിസമ്മതിച്ചാല്‍ എത്ര വലിയ ഏകാധിപതിയായാലും ശരി, ഉരുക്കു കോട്ടകള്‍ നിമിഷ നേരം കൊണ്ട് തവിടുപൊടിയാവും. അതാണ് ലോകം മൊത്തമുള്ള ചരിത്രം നമ്മേ പഠിപ്പിക്കുന്നത്. ജനത്തിന് അടിച്ചമര്‍ത്തുന്നവനെക്കുറിച്ച് ഭയം ഇല്ലാതാകുമ്പോള്‍ അത് താനെ സംഭവിക്കും.
ജനത്തിന്റെ പ്രശ്നങ്ങള്‍
നാം ധാരാളം പ്രശ്നങ്ങള്‍ അനുഭവിക്കുന്നു. അതിലേതെങ്കിലുമൊന്നിന് ഒരു പരിഹാരം നിങ്ങള്‍ക്കുണ്ടെന്ന് കരുതുക. നിങ്ങള്‍ അത് നടപ്പാക്കാന്‍ പരിശ്രമിക്കുന്നു. നിങ്ങളുടെ ആശയത്തില്‍ വിശ്വസിക്കുന്നതും അധികാരളെ വിസമ്മതിക്കുന്നതുമായ ഒരു കൂട്ടം critical mass ആളുകളെ ഒത്തുകൂട്ടുക എന്ന കാര്യമാണ് ഇനി വേണ്ടത്.
അധികാരികള്‍ അത് അനുവദിക്കുന്നില്ല. പക്ഷേ ആ പരിഹാരം 100% ശരിയാണെന്ന് നിങ്ങള്‍ക്കറിയാം. അതുകൊണ്ട് എന്ത് വിലകൊടുത്തും അത് നടപ്പാക്കാനായി അധികാരികള്‍ക്കെതിരെ അക്രമത്തിന്റെ മാര്‍ഗ്ഗം തെരഞ്ഞെടുക്കുന്നു. എന്നാല്‍ അധികാരകള്‍ വെറുതെയിരിക്കില്ല. അവര്‍ ഇതുവരെ നടത്തിയതിനേക്കാള്‍ കൂടുതല്‍ ശക്തമായ രീതിയില്‍ അടിച്ചമര്‍ത്തല്‍ അഴിച്ചുവിടുന്നു. നിങ്ങള്‍ തിരിച്ചും.
ഫലത്തില്‍ നിങ്ങള്‍ എന്തിനെക്കുറിച്ച് സംസാരിക്കാനാഗ്രഹിച്ചിരുന്നുവോ അത് ആളുകള്‍ മറക്കുകയും പകരം ചര്‍ച്ച മുഴുവന്‍ നിങ്ങളുണ്ടാക്കിയ പുതിയ അക്രമ പ്രവര്‍ത്തനത്തെക്കുറിച്ചാവും നടക്കുക. അതുകൊണ്ട് നിങ്ങള്‍ നടത്തിയ പ്രവര്‍ത്തനം ശരിക്കും പ്രതിലോമകരമായി മാറുന്നു. പഴയ പ്രശ്നം അതുപോലെ തന്നെ നിലനില്‍ക്കുകയും അധികാരികളുടെ വര്‍ദ്ധിച്ച അടിച്ചമര്‍ച്ചല്‍ ജനം സഹിക്കേണ്ടി വരുകയും ചെയ്യും.
അതുകൊണ്ട് ഏത് പ്രതിഷേധത്തേയും വേഗം അക്രമത്തിലേക്ക് എത്തിക്കുക എന്നത് ഏത് അധികാരികളും ആഗ്രഹിക്കുന്ന കാര്യമാണ്. സമാധാനപരമായ രീതിയില്‍ നിങ്ങള്‍ മുന്നോട്ട് പോയാലും കഴിയുന്നത്ര പ്രകോപനമുണ്ടാക്കി നിങ്ങളെ അക്രമത്തിലേക്ക് എത്തിക്കും. തല്ലും കൊല്ലലുമൊക്കെ നടക്കും. നിങ്ങള്‍ ജീവന്‍ രക്ഷക്കെങ്കിലും അക്രമമാര്‍ഗ്ഗം തെരഞ്ഞെടുക്കുമെന്ന് അധികാരികളുടെ പ്രതീക്ഷയാണ്.
നിങ്ങള്‍ ശരിക്കും സമാധാനപരമായ മാര്‍ഗ്ഗത്തിലൂടെ നീങ്ങിയാലും, അധികാരികളുടെ ഗുണ്ടകള്‍ അക്രമം നടത്തി അതിന്റെ കുറ്റം നിങ്ങളുടെ തലയില്‍ വെക്കുന്നതും സാധാരണ സംഭവമാണ്. അല്ലെങ്കില്‍ നിങ്ങളുടെ പ്രസ്ഥാനത്തിലേക്ക് ആ ഗുണ്ടകള്‍ വേഷം മാറി അംഗങ്ങളായി കടന്നുകൂടുകയും അവര്‍ സ്വയം കുറ്റകൃത്യങ്ങള്‍ ചെയ്യുകയോ, നിങ്ങളുടെ സംഘടനയെ അക്രമത്തിന്റെ മാര്‍ഗ്ഗത്തിലേക്ക് നയിക്കുകയോ ചെയ്യാം. അമേരിക്കയിലെ Black Panther Party യെ ആയുധമണിയച്ചത് ജപ്പാന്‍കാരനായ അത്തരം ഒരു പോലീസ് informant ആണെന്ന് ആരോപണമുണ്ട്. സാധാരണ മനുഷ്യരില്‍ തീവൃവാദം കുത്തിവെച്ച്, അവര്‍ക്ക് പൊട്ടാത്ത ബോംബ് നല്‍കി, പിന്നെ പോലീസിനെക്കൊണ്ട് പിടിപ്പിക്കുന്നത് അമേരിക്കയിലെ സാധാരണ സംഭവമാണ്. പരിസ്ഥിതി സംഘടനകളില്‍ പോലും പോലീസിന്റെ ഇത്തരം ഏജന്റുമാര്‍ പ്രവര്‍ത്തിക്കുന്നുണ്ട്.
മാധ്യമങ്ങള്‍ അധികാരികളുടെ പക്ഷത്തായതിനാല്‍ അവര്‍ക്ക് അത്തരം സംഭവങ്ങളെ ഫലപ്രദമായി ഉപയോഗിക്കാനുമാകും. നിങ്ങള്‍ നടത്തുന്ന അക്രമങ്ങളെക്കുറിച്ചാവും വാര്‍ത്തകള്‍ വരുക. അത് നിങ്ങളെക്കൊണ്ട് അക്രമ സമരം നടത്താന്‍ പ്രേരിപ്പിക്കുകയും ചെയ്യും.
വിജയം
ഇനി നിങ്ങള്‍ അക്രമമാര്‍ഗ്ഗത്തിലൂടെ വിജയിച്ചെന്ന് കരുതുക. നിങ്ങളായി പുതിയ അധികാരി. അപ്പോഴും പ്രശ്നം ഇല്ലാതാവില്ല. നിങ്ങളുടെ നയം നടപ്പാക്കാനും അധികാരം നിലനിര്‍ത്താനും നിങ്ങള്‍ക്ക് ജനത്തിന് മേല്‍ അടിച്ചമര്‍ത്തല്‍ നടത്തേണ്ടിവരും. വാളെടുത്തവന്‍ വാളാലെ എന്ന് പറയുന്നത് പോലെ.
അക്രമ ആശയ തീവൃവാദങ്ങള്‍
ഭൌതികമായി അക്രമം പോലെയാണ് ആശയ തീവൃവാദങ്ങള്‍. ഉദാഹരണത്തിന് യുക്തിവാദം, ഫെമിനിസം, മതം തുടങ്ങിയവ. ഭൌതികമായി അക്രമപ്രവര്‍ത്തനങ്ങളൊന്നും അവര്‍ ചെയ്യുന്നില്ല. എന്നാന്‍ അവര്‍ വിശ്വസിക്കുന്ന ആശയങ്ങളെ കണ്ണടച്ച് വിശ്വസിക്കുകയും അതിനെ അംഗീകരിക്കാത്തവരേയും വിമര്‍ശിക്കുന്നവരേയും മോശക്കാരായും കണ്ടുകൊണ്ട് ആശയവിനിമയത്തില്‍ അക്രമത്തിന്റെ ഭാഷ തെരഞ്ഞെടുക്കുകയും ചെയ്യുന്നു. എന്നാല്‍ അത് ആര്‍ക്കും ഒരു ഗുണവും ചെയ്യുന്നില്ല. ഈ വിദ്വാന്‍മാരുടെ ഗീര്‍വ്വാണം കേട്ട് അനുയായികള്‍ ചിലപ്പോള്‍ സാഹസ പ്രവര്‍ത്തികളില്‍ എടുത്തുചാടി സ്വയം നശിക്കാം. അതുപോലെ മറ്റുള്ളവര്‍ ഇതിനെ നേരിടാന്‍ അവരവരുടെ വിശ്വാസ പ്രതിരോധം ശക്തമാക്കുകയും ചെയ്യുന്നു. സമൂഹം ഇവര്‍ക്കെതിരെ സംഘടിച്ച് പ്രതികരിക്കുകയും ചെയ്യാം. നമ്മുടെ ആശയം സമാധാനപരമായി പരസ്പര ബഹുമാനത്തോടെ എതിര്‍ക്കുന്നവരെക്കൂടി ഉള്‍ക്കൊണ്ട് വേണം ചെയ്യാന്‍. ആളുകളെന്തെങ്കിലും വിശ്വസിക്കുന്നുണ്ടെങ്കില്‍ അതിന് കാരണമുണ്ടാകും. ആ കാരണം കണ്ടെത്തി അതിനെയാണ് അഭിസംബോധന ചെയ്യേണ്ടത്.
നമുക്ക് പുറത്തുള്ള ആളുകളെ ശത്രുക്കളായി ഒരിക്കലും കണക്കാക്കരുത്. അവരുടെ സമ്മതമില്ലാതെ നമുക്കൊരിക്കലും അവരുടെ മനസിലേക്ക് കയറാനാവില്ല.
സാമൂഹ്യമാറ്റത്തിന് സമാധാനപരമായ പ്രതിഷേധം മാത്രമാണ് വഴി. അതിന് ധാരാളം മാര്‍ഗ്ഗങ്ങളുണ്ട്. ജാഥ നടത്താം, സമ്മേളനം നടത്താം, പ്രസിദ്ധീകരണങ്ങള്‍ പ്രചരിപ്പിക്കാം, സമരം നടത്താം, സമാധാനപരമായി നിയമം ലംഘിച്ച് ജയിലില്‍ പോകാം അങ്ങനെ അനേകം വഴികളുണ്ട്. സമാധാനപരമല്ലാത്ത വഴികളെല്ലാം ഇപ്പോഴത്തെ അധികാരികളെ സഹായിക്കുന്ന വഴികളാണ് എന്ന സത്യം തിരിച്ചറിയുക. അതുകൊണ്ട് ഒരു പ്രശ്നത്തിലും വികാരം കൊള്ളരുത്. അഥവാ അങ്ങനെ തോന്നുന്നെങ്കില്‍ തിരിച്ചറിയുക നിങ്ങള്‍ അധികാരികളെ സഹായിക്കുകയാണെന്ന്.
Nullius in verba
ആരുടേയും വാക്ക് വിശ്വസിക്കരുത്
ലാഭേച്ഛയില്ലാതെ പ്രവര്‍ത്തിക്കുന്ന ഒരു സ്വതന്ത്ര ജനകീയ മാധ്യമമാണ് നേരിടം. ഈ പ്രവര്‍ത്തനത്തില്‍ താങ്കളുടെ സഹായവും ആവശ്യമുണ്ട്. അതിനാല്‍ ഈ ജനകീയ മാധ്യമത്തിന്റെ നിലനില്‍പ്പ് ആഗ്രഹിക്കുന്ന താങ്കള്‍ കഴിയുന്ന രീതിയില്‍ പങ്കാളികളാവുക.
To read post in English:
in the URL, after neritam. append wordpress. and then press enter key.
